სუს-მა "ისლამური სახელმწიფოს“ ერთ-ერთი დაჯგუფების მეთაური, მალხაზ პაქსაშვილი დააკავა

22.04.23 10:40
სუს-მა "ისლამური სახელმწიფოს“ ერთ-ერთი დაჯგუფების მეთაური, მალხაზ პაქსაშვილი დააკავა

ისლამური სახელმწიფოს წევრობის ბრალდებით საქართველოს მოქალაქეა დაკავებული. მალხაზ პაქსაშვილი სუს-მა აიყვანა. სახელმწიფო უსაფრთხოების სამსახურში ამბობენ, რომ პაქსაშვილი ტერორისტული ორგანიზაციის ერთ-ერთი დაჯგუფების მეთაური იყო. 

პაქსაშვილიის კვალი ძმებ ტოღოსაშვილებამდე მიდის, პანკისის მკვიდრებამდე, რომლებიც უკვე წლებია ასევე ტერორიზმის ბრალდებით სასჯელს ციხეში იხდიან.

სახელმწიფო უსაფრთხოების სამსახურის კონტრტერორისტულმა ცენტრმა ჩატარებული სპეციალური ოპერაციის შედეგად, სასამართლო განჩინების საფუძველზე, ტერორისტული ორგანიზაცია „ისლამური სახელმწიფოს“ ერთ-ერთი დაჯგუფების მეთაური, საქართველოს მოქალაქე მალხაზ პაქსაშვილი დააკავა.
 
კონტრტერორისტული ცენტრის, საქართველოს გენერალური პროკურატურისა და შინაგან საქმეთა სამინისტროს ერთობლივი ღონისძიებების შედეგად გამოძიების ფარგლებში მოპოვებული მტკიცებულებებით დადგინდა, რომ აღნიშნულმა პირმა საქართველო 2013 წელს დატოვა, სირიაში გაემგზავრა და ტერორისტულ ორგანიზაცია „ისლამურ სახელმწიფოს“ შეუერთდა.
 
2013-2015 წლებში იგი ე.წ. „სამხედრო ემირების“, ძმებ ცეზარ და ცისკარა ტოხოსაშვილების  დაჯგუფებაში ირიცხებოდა და აქტიურ მონაწილეობას იღებდა აღნიშნული ტერორისტული ორგანიზაციის მიერ განხორციელებულ თავდასხმებსა და სამხედრო ოპერაციებში.
 
დაკავებულს მჭიდრო კავშირი ჰქონდა „ისლამური სახელმწიფოს“ მაღალი რანგის სამხედრო მეთაურებთან და აღნიშნული ტერორისტული ორგანიზაციის ერთ-ერთი დაჯგუფების ე.წ. „ნაიბის“ პოზიციას იკავებდა.
 
საქმეზე გამოძიება საქართველოს სისხლის სამართლის კოდექსის 328-ე მუხლით მიმდინარეობს, რაც გულისხმობს უცხო ქვეყნის ტერორისტულ ორგანიზაციაში გაერთიანებას და ტერორისტულ საქმიანობაში დახმარებას. დანაშაული სასჯელის სახით 10-დან 17-ტ წლამდე თავისუფლების აღკვეთას ითვალისწინებს.
 
საქართველოს სახელმწიფო უსაფრთხოების სამსახური აგრძელებს ბრძოლას საერთაშორისო ტერორიზმთან. საქართველო რჩება საერთაშორისო კონტრტერორისტული სისტემის ერთ-ერთ აქტიურ წევრად და საიმედო პარტნიორად".-  აცხადებს სუს-ი კონტრტერორისტული ცენტრის დირექტორის მოვალეობის შემსრულებელი.

მსგავსი სიახლეები