ჩრდილოეთ კორეის ლიდერი კიმ ჩენ ინი რუსეთში ჩავიდა, ის რუსეთის პრეზიდენტს შეხვდება, თუმცა ოფიციალური მოსკოვი არ აკონკრეტებს, კონკრეტულად სად გაიმართება ვლადიმირ პუტინისა და კიმ ჩენ ინის შეხვედრა.

"შორეულ აღმოსავლეთში", - უთხრა მედიას კრემლის სპიკერმა დიმიტრი პესკოვმა.

კიმი ფხენიანიდან რუსეთისკენ კვირას თავისი პირადი მატარებლით გაემგზავრა. დელეგაციის წევრები არიან მთავრობის წევრები და მაღალჩინოსნები. 

"ეს სრულფასოვანი ვიზიტი იქნება", - განაცხადა დმიტრი პესკოვმა.

გამოცემა TASS-ის ინფორმაციით, ვლადიმირ პუტინი ვლადივოსტოკში ორშაბათს ჩავიდა. როგორც ცნობილია, იგი აღმოსავლეთ ეკონომიკური ფორუმის პლენარულ სესიას დაესწრება, რომელიც ოთხშაბათამდე გაგრძელდება.

ლიდერების შეხვედრა ფორუმის შემდეგ გაიმართება და პრესკონფერენცია არ იგეგმება.