ექვსი წელი ოკუპანტების მიერ ჩადენილი სასტიკი დანაშაულიდან - დილიდან ძმათა სასაფლაოზე არჩლ ტატუნაშვილის ოჯახის წევრები, მისი მეგობრები და სამხედროები იმყოფებიან.

წამებით მოკლული სამხედროს დედა იმ მძიმე დღეებს იხსენებს, რომლის გადატანაც ოჯახს მოუხდა.

 რუსუდან ტატუნაშვილისთვის საამაყოა, რომ მისი შვილი გმირია.

როგორც ტატუნაშვილის დედა აცხადებს, არასდროს არ ჰქონდა მოლოდინი, რომ მკვლელობაში ბრალდებულები დაისჯებოდნენ. 

დიდი ვაჟკაცობა ვერ გაპატიეს, აჩიკო. როგორი სიხარულით ამოდიოდი ხოლმე აქ. ჩემი ადგილი აქ არისო, გენაცვალე. წინასწარ იცოდი, რომ აქ უნდა ყოფილიყავი სამუდამოდ.

მე მეტის მოლოდინი არასდროს არ მქონია, რომ დაისჯებოდა. ალბათ, არც დასჯიან არასდროს. ტერიტორია ოკუპირებულია და ისინი არ დასჯიან და თუ არ გადმოგვცეს აქეთ ვინ დასჯის. პირიქით, დააწინაურეს კიდეც. ხშირად დადიოდა მუხათგვერდის ძმათა სასაფლაოზე. რომ მოდიოდა ვეუბნებოდი ხოლმე, ძალიან ხშირად დადიხარ-მეთქი შვილო და ასე მეტყოდა ხოლმე, ჩვენც დავიხოცებით და იქ რომ მივალთ, პირნათელი უნდა ვიყოთ იმ ბიჭებთან და შერცხვენილი არ უნდა ვიყოთო. ასეთი პატრიოტი ადამიანი იყო და ეს ვერ აპატიებს. სამშობლოს სიყვარული, ვაჟკაცობა ვერ აპატიეს. აიძულებდნენ, დროშაზე შემდგარიყო, მაგრამ არ შედგებოდა დროშაზე. საწოლთან ეკიდა დროშა და ისე ეძინა. იცოდა იმ დროშის ფასი. ჯარისკაცი იყო. სულით ხორცამდე ჯარისკაცი იყო. იმ პერიოდში არ მსახურობდა ჯარში, მაგრამ ყოველთვის მზად იყო სამშობლოს დასაცავად", - ამბობს დედა. 

არჩილ ტატუნაშვილი 35 წლის ასაკში რუსმა ოკუპანტებმა საოკუპაციო ხაზიდან 2018 წლის 22 თებერვალს გაიტაცეს, შემდეგ კი წამებით მოკლეს.  

ცხინვალი თითქმის ერთი თვის განმავლობაში ამბობდა უარს, ქართული მხარისა და ოჯახისთვის გადმოეცათ ტატუნასვილის ცხედარი. საბოლოოდ არჩილ ტატუნაშვილის ცხედარი ოჯახს 2018 წლის 20 მარტს გადასცეს. ხოლო თბილისში ჩატარებულმა ექსპერტიზამ დაადგინა, რომ გარდაცვლილს სხეულზე მრავლობითი დაზიანებები აღენიშნებოდა და ამოცლილი ჰქონდა შინაგანი ორგანოები.

არჩილ ტატუნაშვილი 2018 წლის 24 მარტს, მუხათგვერდის ძმათა სასაფლაოზე სამხედრო პატივით დაკრძალეს.