თბილისის ინფექციურ სავადმყოფოში 49 წლის ქალი ყირიმ კონგოს ცხელებით გარდაიცვალა

23.07.21 19:03
თბილისის ინფექციურ სავადმყოფოში 49 წლის ქალი ყირიმ კონგოს ცხელებით გარდაიცვალა

49 წლის ქალი, რომელიც ყირიმ-კონგოს ჰემორაგიული ცხელებით თბილისის ინფექციურ საავადმყოფოში შეიყვანეს, გარდაიცვალა. ინფორმაციას ამის შესახებ  ,,სამხრეთის კარიბჭე“ ავრცელებს. 

უმძიმეს მდგომარეობაში იყო, რეანიმაციაში მოთავსდა და მისი გადარჩენა ვერ მოხერხდა, პროცესები უკვე ღრმად იყო წასული”, – განაცხადეს თბილისის ინფექციურ საავადმყოფოში.

ცხოველთა ტკიპები, რომლებიც ყირიმ-კონგოს ვირუსის გადამტანები არიან, ზაფხულში აქტიურდებიან. ეს დაავადება ადამიანის სიცოცხლისთვის საშიშია. სამცხე-ჯავახეთი ყირიმ-კონგოს გავრცელების მხრივ ერთ-ერთი მნიშვნელოვანი კერაა.

დაავადების მაღალი რისკის ქვეშ ძირითადად ფერმერები, მწყემსები და ვეტერინარები არიან; ასევე – პირები, რომლებიც ახლო კონტაქტში არიან ყირიმ–კონგოს ჰემორაგიული ცხელებით დაავადებულ ადამიანებთან.

ეს ვირუსი პირველად 1944 წელს ყირიმში აღმოჩნდა. მოგვიანებით, მსგავსი დაავადება აღირიცხა კონგოში, ნიგერიაში, სენეგალსა და კენიაში.