ქუთაისის ციხეში დაშავებულ პატიმართან დაკავშირებით ომბუდსმენის აპარატი განცხადებას ავრცელებს და წერს, რომ ამ ეტაპზე, ბრალდებულთან გასაუბრება მისი ჯანმრთელობის მდგომარეობის გამო, ვერ მოხერხდა. 

სახალხო დამცველის აპარატის მიერ გავრცელებულ ინფორმაციაში ნათქვამია, რომ მოხდა მედპერსონალთან გასაუბრება, თუმცა პატიმრის თანხმობის არარსებობის გათვალისწინებით, ამის შესზახებ საჯაროდ ვერ ისაუბრებენ.

26 აგვისტოს სახალხო დამცველის რწმუნებული კლინიკა „ვივამედში“ იმყოფებოდა, რათა გადაემოწმებინა მედიაში გავრცელებული ინფორმაცია N2 დაწესებულებაში ბრალდებულ ნ.ბ.-ს მიერ მიღებული დაზიანებების წარმომავლობისა და მისი ჯანმრთელობის ამჟამინდელი მდგომარეობის შესახებ.

ამ ეტაპზე, ბრალდებულთან გასაუბრება მისი ჯანმრთელობის მდგომარეობის გამო, ვერ მოხერხდა. რწმუნებული შეხვდა და ესაუბრა ექიმს, თუმცა, პერსონალურ ინფორმაციას, პატიმრის თანხმობის არარსებობის გათვალისწინებით, აპარატი არ ავრცელებს. რწმუნებული შეხვდა პატიმრის ოჯახის წევრებსაც.

გარდა ამისა, სახალხო დამცველის წარმომადგენელი იმყოფებოდა N2 პენიტენციურ დაწესებულებაში, სადაც სამედიცინო დოკუმენტაციას გაეცნო და მომხდარი ფაქტის შესახებ დამატებითი ინფორმაციის მისაღებად გაესაუბრა, როგორც ბრალდებულის თანასაკნელებს, ისე დაწესებულების ადმინისტრაციას, დაათვალიერა პატიმარ ნ.ბ.-ს საკანი. უნდა აღინიშნოს, რომ საკანში სამეთვალყურეო ვიდეო კამერებია განთავსებული.

სახალხო დამცველის აპარატის ინფორმაციით, დაწყებულია გამოძიება. გამოძიების მიმდინარეობის შესახებ ინფორმაციის მოპოვების მიზნით, აპარატი მიმართავს საგამოძიებო უწყებას", - წერია განცხადებაში.

ნიკა ბასილაძე მძიმე დაზიანებით "ვივა-მედის" კლინიკაშია მოთავსებული.

ბასილაძის ნათესავებს აქვთ ეჭვი, რომ პატიმარი საკანში უმოწყალოდ სცემეს. 

პენიტენციური სამსახურშის მტკიცებით კი, პატიმარმა ერთჯერადი სამართებლის გამოყენებით ორივე ხელზე დაზიანებები თავად მიიყენა.