თბილისის სახელმწიფო უნივერსიტეტის სტუდენტების ნაწილი თსუ-ს რექტორის, ჯაბა სამუშიას გადადგომას ითხოვს. 

სტუდენტების თქმით, ისტორიული კორპუსი არის გადაქცეული ძალოვანი სტრუქტურების შტაბად, რაც არის უნივერსიტეტის უდიდესი შეურაცხყოფა.

მათივე თქმით, ამ ყველაფერზე პასუხისმგებლობა ეკისრება თბილისის სახელმწიფო უნივერსიტეტის რექტორს, რომელსაც ამ დრომდე განცხადება არ გაუკეთებია.

ჩვენ, თბილისის სახელმწიფო უნივერსიტეტის სტუდენტები ვგმობთ თბილისის სახელმწიფო უნივერსიტეტის ადმინისტრაციის დუმილს განვითარებულ მოვლენებთან დაკავშირებით.

ჩვენთვის კატეგორიულად მიუღებელია უნივერსიტეტის ისტორიული კორპუსის ჩაკეტვა სტუდენტებისთვის, ლექტორებისთვის და მისი  გახსნა საპოლიციო ძალებისათვის, საიდანაც ისინი გვარბევდნენ სტუდენტებსა და აქციის სხვა მონაწილეებს. თბილისის სახელმწიფო უნივერსიტეტის ისტორიული კორპუსი არის გადაქცეული ძალოვანი სტრუქტურების შტაბად, რაც არის უნივერსიტეტის უდიდესი შეურაცხყოფა.

დღეს ძალოვნები (პოლიციელები და შავებში გადაცმული ხალხი, რომლებიც ვერ გვიმხელენ ვინაობას) დგანან უნივერსიტეტის პირველ კორპუსსა და ეზოს ტერიტორიაზე. შენობაში უშვებენ მხოლოდ მათ, ვისი სიაც აქვთ ხელთ. ჩვენთვის გაურკვეველია, როგორაა შედგენილი აღნიშნული სია, რამეთუ სტუდენტების ნაწილს სიაში გადამოწმების გარეშე უშვებენ შიგნით, ხოლო ნაწილს, ასევე სიაში გადამოწმების გარეშე უკეტავენ უნივერსიტეტის კარს.

ამ ყველაფერზე პასუხისმგებლობა ეკისრება თბილისის სახელმწიფო უნივერსიტეტის რექტორს, რომელსაც ამ დრომდე განცხადება არ გაუკეთებია“, - წერია მათ მიერ გავრცელებულ განცხადებაში.

ცოტა ხნის წინ “პირველებმა“ გაავრცელა ექსკლუზიური კადრები, სადაც ჩანს, როგორ ტოვებენ უნივერსიტეტის შენობას ნიღბიანი პირები, არადა თსუ-ს ადმინისტრაცია მთელი დღე ამტკიცებდა, რომ რექტორ ჯაბა სამუშიას  უნივერსიტეტი საპოლიციო ძალებისთვის არ დაუთმია.