იორდანიაში, ბერძნულ მართლმადიდებლურ ეკლესიაში, დაკრძალვის ცერემონიის დროს განხორციელებულ შეიარაღებულ თავდასხმას ცხრა ადამიანი ემსხვერპლა. დაშავებულია ათობით პირი.

შემთხვევა 23 ოქტომბერს, კარაკის პროვინციის სოფელ ჰამუდში, წმინდა გიორგის ეკლესიაში მოხდა. გავრცელებული ინფორმაციით, სულ მცირე სამი შეიარაღებული თავდამსხმელი ავტომობილით მივიდა ეკლესიასთან და იქ შეკრებილ ადამიანებს ცეცხლი გაუხსნა.

თვითმხილველების თქმით, სროლა რამდენიმე წუთს გაგრძელდა. თავდამსხმელებმა შემთხვევის ადგილიდან გაქცევა მოახერხეს.

იორდანიის ხელისუფლებამ მომხდარი ტერორისტულ აქტად შეაფასა. შინაგან საქმეთა მინისტრის, მაზენ ალ-ფარაიას განცხადებით, თავდასხმა ექსტრემისტებმა განახორციელეს, თუმცა ჯერჯერობით უცნობია, არიან თუ არა ისინი დაკავშირებული ქვეყანაში ან მის ფარგლებს გარეთ მოქმედ რომელიმე ტერორისტულ დაჯგუფებასთან.

იორდანიის მეფემ, აბდულა მეორემ, თავდასხმა დაგმო და დამნაშავეების უმკაცრესად დასჯის პირობა დადო.

ქვეყანაში სამდღიანი გლოვა გამოცხადდა. სამართალდამცველები თავდამსხმელებს ეძებენ. მომხდარზე გამოძიება მიმდინარეობს.