ესპანეთის ცენტრალურ ნაწილში სარკინიგზო ავარიას სულ მცირე, 68 ადამიანის სიცოცხლე ემსხვერპლა, ათობით ადამიანი კი დაშავდა. შემთხვევა ოთხშაბათს დილით მოხდა, როდესაც მადრიდიდან სევილიის მიმართულებით მიმავალი მატარებელი რელსებზე გაჩერებულ სხვა მატარებელს შეეჯახა. მომხდარი ტრაგედიის გამო ქვეყანაში სამდღიანი გლოვა გამოცხადდა.

მომხდარი ტრაგედიის შემდეგ, მთავრობის გადადგომის მოთხოვნით საპროტესტო აქცია გაიმართა.

მედიის ინფორმაციით, ღამით მომიტინგეებს, ულტრამემარჯვენე ჯგუფებსა და პოლიციას შორის შეტაკება მოხდა. ტრანსპორტის სამინისტროსთან დაახლოებით 500 დემონსტრანტი შეიკრიბა, რომელთაგან ზოგიერთი პოლიციას ბოთლებსა და პიროტექნიკას ესროდა. პოლიციამ შეკრებილების დასაშლელად ცრემლსადენი გაზი გამოიყენა. მომიტინგეებს ესპანეთის პრემიერ-მინისტრ პედრო სანჩესის სურათის გვერდით ეჭირათ პლაკატები წარწერით „წადი!“, ზოგიერთს კი პლაკატები წარწერით „კრიმინალები“ ​​და „კორუფცია კლავს“.

ესპანეთის პროფკავშირი CSIF ტრანსპორტის მინისტრ ოსკარ პუენტეს გადადგომას მოითხოვს მას შემდეგ, რაც მან განაცხადა, რომ ავარია მატარებლის მოძრაობის მართვის დისპეტჩერის მიერ გაცემულმა „აუხსნელმა“ მცდარმა ბრძანებამ გამოიწვია.

• მინისტრის განმარტებით, კომპიუტერულმა სისტემურმა გაუმართაობამ მადრიდსა და სევილიას შორის სარკინიგზო ხაზის 63-კილომეტრიან მონაკვეთზე უსაფრთხოების სისტემის მუშაობაში შეფერხება გამოიწვია, რის გამოც ამ მონაკვეთზე ყველა მატარებელი ავტომატურად გაჩერდა. პუენტეს თქმით, ამის შემდეგ ესპანეთის რკინიგზის მართვის სახელმწიფო კომპანია Adif-მა სისტემის მართვა ხელით რეჟიმში გადაიყვანა და ჩქაროსნულ მატარებელს, Renfe-ს, წითელი სიგნალის მიუხედავად, სამხრეთის მიმართულებით, სევილიისკენ მოძრაობის გაგრძელების ნება დართო. მოგვიანებით ეს მატარებელი გაჩერებულ მატარებელს, Iryo-ს, შეეჯახა.