ბრძოლა ჰორმუზის სრუტისთვის - ვაშინგტონსა და თეირანს შორის უპრეცედენტო სამხედრო ესკალაცია უკვე მეოთხე ღამეა გრძელდება.

აშშ-მა ირანის წინააღმდეგ დარტყმების მორიგი რაუნდი დაასრულა, რომლის დროსაც ჰორმუზის სრუტესა და სანაპირო ზოლთან ახლოს ათობით სამხედრო სამიზნეზე მიიტანა იერიში.

„შვიდსაათიანი ტალღის განმავლობაში აშშ-ის გამანადგურებელმა თვითმფრინავებმა, დრონებმა და საზღვაო გემებმა ირანის რაკეტებისა და დრონების ობიექტების, საზღვაო შესაძლებლობებისა და სანაპირო თავდაცვის სისტემების წინააღმდეგ ზუსტი საბრძოლო მასალა გამოიყენეს, რათა კიდევ უფრო შეემცირებინათ ირანის შესაძლებლობა, საფრთხე შეუქმნას კომერციულ გადაზიდვებსა და სამოქალაქო ეკიპაჟებს“, - დაწერა CENTCOM-მა X-ზე.

მანამდე ცნობილი გახდა, რომ აშშ-მა ირანის პორტებისკენ მიმავალი და იქიდან გამომავალი გემების საზღვაო ბლოკადა განაახლა.

მას შემდეგ, რაც აშშ-ის გამანადგურებლებმა და დრონებმა ირანის რაკეტებისა და თავდაცვის სისტემების წინააღმდეგ ზუსტი საბრძოლო მასალა გამოიყენეს, ირანულმა ძალებმა ბალისტიკური რაკეტების ტალღა ქუვეითის, ბაჰრეინისა და იორდანიის მიმართულებით გაუშვეს.

ქუვეითის სანაპიროსთან ირანულ იერიშს სამხედრო გემი ემსხვერპლა, რის შედეგადაც ოთხი სამხედროა დაჭრილი. თეირანმა ოფიციალურად გააუქმა ცეცხლის შეწყვეტის მემორანდუმი, რაზეც თეთრი სახლის პასუხი უკომპრომისოა: დონალდ ტრამპი ირანს ულტიმატუმს უყენებს და მოლაპარაკების მაგიდასთან არდაბრუნების შემთხვევაში ქვეყნის სამოქალაქო ინფრასტრუქტურის, ხიდებისა და ელექტროსადგურების სრულ განადგურებას აანონსებს.