უკრაინული დრონების თავდასხმის შემდეგ, რუსეთში ერთ-ერთმა უდიდესმა ნავთობქიმიურმა კომპლექსმა - Салават-მა  მუშაობა შეწყვიტა. 

დრონების თავდასხმის შედეგად ქარხნის ორივე პირველადი გადამამუშავებელი ბლოკი დაზიანდა და გაითიშა. ესენია CDU-6, (დღეში 17,140 ტონა სიმძლავრით) და CDU-4, რომელსაც დღეში 11,430 ტონა ნავთობისა და გაზის კონდენსატის დამუშავება შეუძლია.

ასევე დაზიანდა მეორადი გადამამუშავებელი ზოგიერთი ბლოკი და სხვა აღჭურვილობა. წყაროების ვარაუდით, შეკეთებას შესაძლოა რამდენიმე კვირა ან თვეც კი დასჭირდეს.

ადგილობრივმა გუბერნატორმა დაადასტურა თავდასხმა, მაგრამ განაცხადა, რომ ქარხანა, სავარაუდოდ, რამდენიმე დღეში ნორმალურ წარმოების დონეს დაუბრუნდება.

2024 წელს სალავატმა გადაამუშავა 7.2 მილიონი ტონა ნავთობი, ანუ რუსეთის ნავთობგადამუშავების მთლიანი მოცულობის დაახლოებით 2.7%. ქარხანამ აწარმოა 2.5 მილიონი ტონა დიზელის საწვავი, 1.5 მილიონი ტონა ბენზინი და 700,000 ტონა მაზუთი.

კომპლექსი ასევე აწარმოებს თხევად აირებს, პოლიეთილენს, პოლისტიროლს, ამიაკს და სხვა ნავთობქიმიურ პროდუქტებს.