"ერთად აღმოვჩნდით ციხეში მომწამლავიც და მოწამლულიც" - ამის შესახებ საქართველოს მესამე პრეზიდენტი, მიხეილ სააკაშვილი ციხიდან გამოგზავნილ წერილში წერს, რომელიც მის Facebook გვერდზე ვრცელდება და გრიგოლ ლილუაშვილის დაკავებას ეხმიანება. 

მიხეილ სააკაშვილი წერს, რომ სუს-ის ექს-შეფის დაკავებით ბიძინა ივანიშვილმა რუსებსაც და ამერიკელებსაც მესიჯი გაუგზავნა - "ახლა ივანიშვილი აჩვენებს რუსებს და ამერიკელებს, რომ სწორედ ის აკონტროლებს ქვეყანაში მდგომარეობას". 

აი ერთად აღმოვჩნდით ციხეში მომწამლავიც და მოწამლულიც, მალე საკანში მოწამვლის შემკვეთმა უნდა ჩამანაცვლოს და ყველაფერი თავის ადგილზე დადგება (დაჯდება).

უფრო სერიოზულად კი ლილუაშვილის დაჭერით ივანიშვილი უგზავნის მესიჯს ორივეს, რუსებსაც და ამერიკელებსაც. საქმე იმაშია, რომ ლილუაშვილი იყო მთავარი კონტაქტ პერსონა ФСБ-ს პოსტსაბჭოთა სივრცის კურატორთან, გენერალ ბესედასთან, რომელიც სწორედ მან ჩამოიყვანა მცხეთაში საქეიფოდ. სწორედ ლილუაშვილს მისცეს რუსებმა ჩემი ადგილმდებარეობის შესახებ ინფორმაცია 2021 წელს.

ასევე ლილუაშვილი ასრულებდა ამერიკელების ცალკეულ დავალებებს ირანელებთან და ისლამისტებთან მიმართებაში (ამიტომაც არ დასანქცირდა).

ახლა ივანიშვილი აჩვენებს რუსებს და ამერიკელებს, რომ სწორედ ის აკონტროლებს ქვეყანაში მდგომარეობას და ნებისმიერი მცდელობა მის ზურგს უკან რამის კეთების და ოლიგარქის ძირგამოთხრის, მის მიერ წინააღმდეგობას წააწყდება.

რუსები თავის მხრივ უკმაყოფილო არიან ივანიშვილით იმის გამო, რომ ბოლომდე არ უსრულებს მიცემულ დაპირებებს და ასევე იმიტომ, რომ ვერ ჩაახშო პროტესტი ბოლომდე," - წერს მიხეილ სააკაშვილი. 

ასევე ნახეთ:

• გრიგოლ ლილუაშვილი დააკავეს
• რას ედავებიან გრიგოლ ლილუაშვილს და რამდენი წლით პატიმრობა ემუქრება სუს-ის ექს-შეფს?
• პროკურატურა: ლილუაშვილი ქრთამის სანაცვლოდ მფარველობას უწევდა საბავშვო ბაღების მართვის სააგენტოს ყოფილ დირექტორს, რომელიც ქრთამის სახით ე.წ. „ატკატებს“ იღებდა