"მიკროფონებისთვის იომეს და საბოლოოდ ყველა ციხეში გაგვაერთიანა ბიძინამ" - ამის შესახებ ლევან ხაბეიშვილი ციხიდან გამოგზავნილ წერილში წერს და "ნაციონალურ მოძრაობაში" თავმჯდომარის პოზიციიდან გადაყენების დეტალებს ყვება. 

"ჩემი დონე არ მოსწონდათ" - დაწერა ენმ-ს პოლიტსაბჭოს მოქმედმა თავმჯდომარემ, რითაც მიხეილ სააკაშვილის მიერ ინგა გრიგოლიას გადაცემა "რეაქციისთვის" ექსკლუზიურად მიცემულ ინტერვიუს გამოეხმაურა. 

რადგან საინტერესოა, გიპასუხებთ!

ჩემთვის სტატუსი და თანამდებობა ენმ-ში არის ხალხის სიყვარული, სითბო, ნდობა, მათი დამოკიდებულება. გულწრფელად ვფიქრობ, რომ ამ სიყვარულსა და ნდობაში ახლაც ბევრი ვერავინ შემეცილება.

შესაბამისად, ეს არის ჩემი სტატუსი და თანამდებობა ენმ-ში.

შიდა არჩევნებში 25 ათასი ხმა მივიღე და ისე გავიმარჯვე! ამდენ ხმაზე შიდა არჩევნებში კი არა, პარტიები ეროვნულ არჩევნებში ოცნებობენ.

კიდევ ბევრი დრო დასჭირდება, რომ ამხელა ნდობით, მანდატითა და შიდა დემოკრატიით აირჩიონ “ლიდერი”.

მაშინაც ეს პოზიცია მქონდა და ახლაც ასე ვფიქრობ.

არჩევნების დროსვე განვაცხადე, რომ ამ პარტიის უპირობო ლიდერი არის მიხეილ სააკაშვილი და რადგან ის ტყვეობაშია, მხოლოდ ამიტომ ვმონაწილეობდი არჩევნებში და არა რაიმე ამბიციების გამო.

2024 წელს, როდესაც არჩევნები ახლოვდებოდა და ამასობაში სახის ძვლები დამილეწეს, ღმერთის წყალობით ინვალიდობას გადავრჩი, სწორედ მაშინ დადგა ოპოზიციის გაერთიანების საკითხი.

შიდა საუბრებში სხვა ოპოზიციონერები, ჩემთან ერთად, კოალიციას სკეპტიკურად უყურებდნენ. ჩემი „დონე“ არ მოსწონდათ.

ამასთან, ივანიშვილის ქოცპროპაგანდა დილა-საღამოს მებრძოდა, მაშავებდა, ხოლო ამ ყველაფერს ოპოზიცია შიგნით იყენებდა და ცხადია ეს საკითხი მარტივად გადავწყვიტე. თანამდებობა, საარჩევნო სია (სადაც მეთოთხმეტე ვიყავი) ჩემთვის მეათეხარისხოვანი იყო. შესაბამისად, საერთო საქმისთვის გავიწიე..

თუ მე ვიყავი პრობლემა, რომ ბიძინაზე გაგვემარჯვა და ერთობა ყოფილიყო, აბა, ამ საკითხს როგორ დავაყენებდი კითხვის ნიშნის ქვეშ?! ხო და ხუთ წუთში ვთქვი, რომ მე გავიწევი და აგერ ბურთი და აგერ მოედანი. ცხადია, „მე“ მიზეზი ვიყავი, თორემ არავინ არსად არ გაერთიანდა…

მიკროფონებისთვის იომეს და საბოლოოდ ყველა ციხეში გაგვაერთიანა ბიძინამ.

არც მომავალში ვაპირებ, რაიმე პროცესში შემაფერხებელი ვიყო. თუმცა უნდა ვაღიარო, რომ ძალიან ძლიერად ვგრძნობ თავს და ისიც ვიცი, ენმ-სთან და ხალხთან ერთად, როგორ მივიყვან ბრძოლას

ბოლომდე.

არანაირი თანამდებიბა არ მჭირდება იმისათვის, რომ ვემსახურო ჩემს ხალხს! მე ვარ მოსამსახურე ჩემი ხალხის და შესაბამისად მათი სიყვარული და ნდობა არის ჩემი უმაღლესი თანამდებობა!

ერთადერთ რამეზე მაქვს “პრეტენზია”, მაქვს ამბიცია, რომ ბევრი ვერ შემეჯიბრება საქმეში, ბრძოლაში და ხალხის ჩემდამი დამოკიდებულებაში. საერთოდ არ მგონია ახლა ეს საკითხი საინტერესო, განსახილვევი, მაგრამ რადგან ჩემგან დამოუკიდებლად აქტუალური გახდა ეს თემა, მეც გაგიზიარეთ ჩემი პოზიცია.

და მაინც, საქმეს მივხდოთ, საქმეს," - წერს ლევან ხაბეიშვილი. 

„რეაქციისთვის“ მიცემული, ექსკლუზიური ინტერვიუდან ირკვევა, რომ თავის დროზე ლევან ხაბეიშვილის პარტიული თანამდებობა ინგლისურის არცოდნას შეეწირა.

"ლევანს ინგლისურს უწუნებდნენ, მოვიყვანეთ თინა და „სვეცკებმა“ ხმა მაინც არ მოგვცეს"- თქვა სააკაშვილმა. 

• რატომ მიდიან ენმ-დან თავმჯდომარეები სკანდალით - კითხვას სააკაშვილი პასუხობს