საქართველოს მეხუთე პრეზიდენტი ამბობს, რომ პარტიების აკრძალვა "ოცნებისთვის" იმ "უფსკრუულის დასაწყისი იქნება, რომელშიც ისინი ჩადიან". 

როგორც სალომე ზურაბიშვილმა ფბ-ლაივში განაცხადა, პარტიების აკრძალვა მხოლოდ იმ მიზეზით, რომ "ოცნებას" ასე სურს, არ შეიძლება - "ასე, მინდა დავრჩეთ მე და ჩემი ნაბადი, არ არსებობს".

მისივე შეფასებით, ეს პროცესი, რა ახლა ბათუმის საკონსტიტუციოში მიმდინარეობს, თავად "ოცნებისთვის" არ იქნება სასიკეთო. 

ხვალ რომ პარტიები აკრძალონ ამას რეჟიმისთვის არანაირი სასიკეთო არ ექნება. ამითი ასრულებს იმ სურათს - სრული დიქტატურის. ქვეყანა სადაც პოლიტიკური პარტიები აკრძალულები არიან, ასე უმიზეზოდ, არსებობს ძალიან მცირე მაგალითები ქვეყნების, რომლებიც კრძალავენ პარტიებს იმიტომ რომ არის დადგენილი კავშირი ტერორისტულ აქტებთან, და ასე პოლიტიკური პარტიების აკრძალვა, რომ არ გვაწყობს, აღარ მინდა და მინდა დავრჩეთ მე და ჩემი ნაბადი, ასეთი რამ არ არსებობს და ასეთ რამეს არასოდეს არ მოაქვს დადებითი შედეგი იმათთვის ვინც ამ ბერკეტებს იყენებენ და იმედი აქვთ, რომ ამით გაძლიერდებიან და რაღაც კონსოლიდაცია მოხდება. არანაირი კონსოლიდაცია, პირიქით, ეს არის საწყისი იმ უფსკრულის, რომელშიც ჩადიან და ჩადიან", - განაცხადა სალომე ზურაბიშვილი  

5 ოპოზიციური პარტიის არაკონსტიტუციურად ცნობასთან დაკავშირებით სასამართლო სხდომა ხვალ, 29 ოქტომბერს 11:00 საათზე განახლდება.

საკონსტიტუციო სასამართლოს თავმჯდომარის, რევაზ ნადარაიას განცხადებით, სასამართლო ახსნა-განმარტების ეტაპზე რჩება და ხვალ პროცესი „კოალიცია ცვლილებისთვის“ წარმომადგენლის, ნიკა გვარამიას ახსნა-განმარტებით გაგრძელდება.

შეგახსენებთ, რომ დღეს საკონსტიტუციო სასამართლოს სხდომაზე „კოალიცია ცვლილებისთვის“ ახსნა-განმარტებები მოისმინეს.

ცნობისთვის, საკონსტიტუციო სასამართლოში სარჩელის განხილვა 21 ოქტომბერს დაიწყო. საქმეს საკონსტიტუციო სასამართლოს შვიდი მოსამართლის შემადგენლობით პლენუმი იხილავს.

• საკონსტიტუციო სასამართლოში წარდგენილ სარჩელს პარლამენტის 88 დეპუტატი წევრი აწერს ხელს. მათი სარჩელის საფუძველზე სასამართლოს დღის წესრიგში შემდეგი ხუთი პოლიტიკური გაერთიანებების არაკონსტიტუციურად ცნობის საკითხი დგას: - „ერთიანობა − ნაციონალური მოძრაობა“; „კოალიცია ცვლილებისთვის - გვარამია მელია გირჩი დროა“; „ძლიერი საქართველო − ლელო, ხალხისთვის, თავისუფლებისთვის!“, „ფედერალისტური პარტია“ და პარტია „გახარია საქართველოსთვის“.