„ნაციონალური მოძრაობის“ დეპუტატის, თინა ბოკუჩავას ინფორმაციით, დღეს „ოცნება“თავისი პარტიული "ზონდერების" გამოყენებით აქცია-პერფორმანსს აპირებდა, თუმცა როგორც ჩანს, გადაიფიქრეს.

ბოკუჩავას თქმით, იყვნენ გარკვეული პირები, რომლებიც დაბნეულები დადიოდნენ პარლამენტის შენობაში. 

ამასთან, მან ისაუბრა გუშინ პარლამენტის სხდომათა დარბაზში მომხდარ ინციდენტზე, როდესაც შშმ პირების თანმხლებმა ადამიანმა რუსული ვალუტა გადმოყარა. ბოკუჩავას თქმით, მოქალაქემ ამგვარად მშვიდობიანი ფორმით პროტესტი გამოხატა.

„გუშინ იყო შშმ პირთა დაცვის დღე. თავად მიხეილ სარჯველაძის ორგანიზებით, რომელიც კომიტეტის თავმჯდომარეა, ადამიანები პარლამენტში იმყოფებოდნენ და ერთ-ერთმა შშმ პირის მშობელმა რუსული რეჟიმის წინააღმდეგ პროტესტი მშვიდობიანი ფორმით გამოხატა. თავად ეს ადამიანიც დაადასტურებს, რომ ამ ფაქტთან ჩვენ არანაირი კავშირი არ გვქონია, არც ვიცოდით ამის შესახებ. სხვათა შორის, დღეს „ოცნება“ აპირებდა თავისი პარტიული ზონდერების გამოყენებით აქცია-პერფორმანსს, ჩვენ გვქონდა ინფორმაცია ამასთან დაკავშირებით, შეიძლება ჟურნალისტებმაც იხილეთ გარკვეული პირები, რომლებიც საკმაოდ დაბნეულები დადიოდნენ პარლამენტის შენობაში. როგორც ჩანს, ამ ეტაპზე გადაიფიქრეს, მაგრამ ფაქტია, რომ ძალიან გულზე მოხვდათ გუშინდელი მშვიდობიანი პროტესტის ფორმა, რადგან ის ადამიანი, რომელმაც გამოხატა პროტესტი, მათ ამხელდა მთავარში და ეს არის ამ რეჟიმის მცდელობა, რომ მოახდინოს საქართველოს რუსიფიკაცია, რომ წაართვას ევროპული არჩევანი და ამ რეჟიმის მუდმივი დაახლოება პუტინის რუსეთთან. ეს არის ამ რეჟიმის მთავარი მახასიათებელი და ის, რომ ამხილა ერთ-ერთმა მოქალაქემ მშვიდობიანი პროტესტის ფორმით, როგორც ჩანს, მათთვის ძალიან სერიოზული პრობლემა იყო და იმიტომ მოახდინეს რაღაც ძალადობის ინსცენირების მცდელობა პარლამენტის დარბაზში“, - განაცხადა ბოკუჩავამ.

"ოცნებამ" პარლამენტში პარტაქტივი მიიყვანა - ისინი სხდომათა დარბაზის აივანზე შეიყვანეს. "პირველებმა" რამდენიმე მათგანის იდენთიფიცირება მოახდინა. ეს ის ჯგუფია, რომელიც ოპოზიციურად განწყობილ სტუნდეტებს მაღლივ კორპუსში ფლაერების დარიგების დროს თავს დაესხა.

"ოცნების" მხარდამჭერთა ჯგუფი, პარლამენტში ცენტრალურ აივანზე განათავსეს, ზუსტად იქ საიდანც გუშინ "ქართული ოცნების" წევრებს რუსული რუბლები გადააყარეს.