ნიკა გვარამიას საკასაციო სარჩელის არდაკმაყოფილებას უკიდურესად კრიტიკულად აფასებს კოალიცია მედიის ადვოკატირებისთვის. კოალიციის წევრი არასამთავრობო ორგანიზაციები პირდაპირ აცხადებენ, რომ ნიკა გვარამიას წინააღმდეგ მიმდინარე გამოძიება და სასამართლო პროცესები პოლიტიკურად მოტივირებულია, განაჩენი კი დაუსაბუთებელი.

მედიის ადვოკატირების კოალიცია უზენაესი სასამართლოს მხრიდან უსამართლო გადაწყვეტილების მიღების შემდეგ, პრეზიდენტს მიმართავს და შეწყალებისკენ მოუწოდებს.

მედიის ადვოკატირების კოალიცია უკიდურესად კრიტიკულად აფასებს საკასაციო სასამართლოს განაჩენს ნიკა გვარამიასთან დაკავშირებით, რის შედეგადაც “მთავარი არხის” დირექტორი პატიმრობაში რჩება. ნიკა გვარამიას წინააღმდეგ მიმდინარე გამოძიება და სასამართლო პროცესი პოლიტიკურად მოტივირებულია და განაჩენი უსამართლო და დაუსაბუთებელია.
19 ივნისს საქართველოს უზენაესმა სასამართლომ ტელეკომპანია „მთავარი არხის“ გენერალური დირექტორი ნიკა გვარამია პატიმრობაში დატოვა, დაუშვებლად ცნო რა ნიკა გვარამიას ადვოკატის, ასევე კახაბერ დამენიას და პროკურატურის მიერ შეტანილი საკასაციო საჩივრები. 
მედიის ადვოკატირების კოალიცია, ადგილობრივ და საერთაშორისო ორგანიზაციებთან და სახალხო დამცველთან ერთად, გამოძიების დაწყების დღიდან ვაცხადებდით, რომ ნიკა გვარამიას წინააღმდეგ არსებული საქმე იყო პოლიტიკურად მოტივირებული და რომ ის ადამიანის ფუნდამენტური უფლებების დარღვევას წარმოადგენდა. საკასაციო სასამართლოს განაჩენი კი მხოლოდ ამ უსამართლობის დროში გახანგრძლივებას ემსახურება.
არსებულ ვითარებაში მედიის ადვოკატირების კოალიცია კიდევ ერთხელ მოუწოდებს საქართველოს პრეზიდენტს სალომე ზურაბიშვილს გადადგას ნაბიჯი  “მთავარი არხის” გენერალური დირექტორის გასათავისუფლებლად. იმ დროს, როდესაც უდანაშაულო ადამიანი გამოხატვის თავისუფლების გამო ისჯება, პრეზიდენტმა პროცესს გვერდიდან არ უნდა უყუროს. დროა, საქართველო პრეზიდენტმა აიღოს პოლიტიკური პასუხისმგებლობა, შეიწყალოს ნიკა გვარამია და ევროინტეგრაციის პროცესში პოზიტიური როლი ითამაშოს,“ - წერს მედია კოალიცია.

ადგილობრივი არასამთავრობო ორგანიზაციების გარდა, უზენაესი სასამართლოს უსამართლო გადაწყვეტილების შემდეგ, საქართველოს პრეზიდენტს მთავარი არხის გენერალური დირექტორის შეწყალებისკენ მოუწოდებს "რეპორტიორები საზღვრებს გარეშე" (RSF).