"ხომ არ შეიძლება ზოგიერთი ე.წ. უსაფრთხოების ექსპერტის უადგილოდ ნათქვამ რაღაც იდეებს იყოს აყოლილი ესა თუ ის სახელმწიფო ინსტიტუტი? - რა დამოკიდებულებაა, სხვა ორგანოს უთხრა, თათბირი გამართოს თავისი სათათბირო ორგანოსთან," - ამ სიტყვებით აკრიტიკებს პარლამენტის თავმჯდომარე პრეზიდენტ ზურაბიშვილს.

შალვა პაპუაშვილმა პრეზიდენტი სალომე ზურაბიშვილი ორი დღის წინ, რუსეთში დაწყებული სამხედრო გადატრიალების შემდეგ გაკეთებული საგანგებო განცხადების გამო გააკრიტიკა, რა დროსაც პრეზიდენტი ხელისუფლებას უსაფრთხოების საბჭოს მოწვევისკენ მოუწოდებდა.

უნდა დავფიქრდეთ, რაზეა საუბარი, არასერიოზულია ამდენჯერ გამეორება. ხომ არ შეიძლება ზოგიერთი ე.წ. უსაფრთხოების ექსპერტის უადგილოდ ნათქვამ რაღაც იდეებს იყოს აყოლილი ესა თუ ის სახელმწიფო ინსტიტუტი? უსაფრთხოების საბჭო პრემიერის სათათბირო ორგანოა. ჯერ ერთი, რა დამოკიდებულებაა, რომ სხვა ორგანოს უთხრა, თათბირი გამართოს თავისი სათათბირო ორგანოსთან - თავად გადაწყვეტს, როდის სჭირდება თათბირის გამართვა და მეორე - იქნებ ყველამ ნახოს, ვინ შედის უსაფრთხოების საბჭოს შემადგენლობაში. შედის შინაგან საქმეთა მინისტრი, სახელმწიფო უსაფრთხოების სამსახურის უფროსი, დაზვერვის სამსახურის უფროსი, ფინანსთა მინისტრი, საგარეო საქმეთა მინისტრის. ვინმეს ჰგონია, რომ პრემიერს ყოველდღიურად არ აქვს ამ ადამიანთან კომუნიკაცია და ყოველდღიურად არ განიხილავს იმ საკითხებს, რაც მნიშვნელოვანია? ასე რომ, ესეც ნებსით თუ უნებლიედ ისეთ განცხადებებს წარმოადგენს, რომელიც რეალობასაა აცდენილი. თუ დავაკვირდებით ზოგიერთი ე.წ. უსაფრთხოების ექსპერტის მოსაზრებას, ისინი ჩამოყალიბდნენ საფრთხეების შექმნის ექსპერტებად. ვისმენდით ე.წ. უსაფრთხოების ექსპერტების რაღაც მოსაზრებებს, რომლებიც საზღვრების ჩაკეტვიდან დაწყებული, შეიარაღებული გადაადგილებების მოწყობით დამთავრებული, სხვა არაფერს აკეთებდნენ და საფრთხის შექმნის რეცეპტებს სთავაზობდნენ ჩვენს საზოგადოებას. უნდა დავაკვირდეთ, რომ განსაკუთრებით წელიწად ნახევარი, რაც ომი მიმდინარეობს, ეს არ არის პირველი შემთხვევა საქართველოს წინააღმდეგ ჰიბრიდული ომის ტაქტიკების გამოყენების - პანიკის შექმნის მცდელობა, საზოგადოების დეზორიენტაციის მცდელობა. ყოველ ჯერზე დადასტურდა, რომ საქართველოს ხელისუფლება, მთავრობა, პრემიერ-მინისტრი სწორად მოქმედებს, ხოლო ე.წ. მრჩევლები არასწორ აზრებს ავითარებენ. შემდეგი ჯერი რომ დადგება და შემდეგ წრეზე რომ წავლენ ექსპერტები, ოპოზიცია, „ენჯეოები“, ისევ იტყვიან - შემოვიღოთ ვიზა, ჩავკეტოთ საზღვრები, ფრენა, ყველამ უნდა გაიხსენოს, როგორ ჩაფლავდა მათი ეს ექსპერტული აზრები“, - განაცხადა პაპუაშვილმა.