"მას არ აქვს არც უფლება და არც ლეგიტიმაცია, გაავრცელოს ჭორები პრეზიდენტის  თითქოსდა პოზიციებსა და მოსაზრებებზე," - ამ განცხადებას პრეზიდენტის ადმინისტრაცია ავრცელებს და "ნაციონალური მოძრაობის" რიგებში გადასული მათი ყოფილი თანამშრომლის "ტვ პირველისთვის" მიცემულ ინტერვიუს ეხმაურება.

პრეზიდენტის ადმინისტრაციისთვის მიუღებელი აღმოჩნდა ის განცხადებები, რაც ალექსანდრე კრევო-ასათიანმა "ტვ პირველის" ეთერში გააკეთა და სალომე ზურაბიშვილის დამოკიდებულებებზე ისაუბრა, როგორც ოლიგარქთან, ასევე მიხეილ სააკაშვილსა და პრემიერთან დაკავშირებით.

პრეზიდენტის ადმინისტრაცია   ეხმაურება „ტვ პირველის“ ეთერში გასულ ინტერვიუს პიერ-ალექსანდრე კრევოსთან. 
საზოგადოების იმ მცირე ნაწილისთვის, რომელიც მისი  საუბრით დაინტერესდა, საჭიროა რამდენიმე ფაქტობრივი ინფორმაციის მიწოდება. 
ის არასდროს  იკავებდა საქართველოს პრეზიდენტის მრჩევლის პოზიციას. იგი 2018 წლის 24 დეკემბრიდან იყო სტაჟიორი. პრეზიდენტის ეს გადაწყვეტილება იმ მიდგომის შემადგენელი ნაწილი იყო, რომელიც უცხოეთში მყოფი ქართული წარმოშობის ახალგაზრდებისთვის სამშობლოში დაბრუნების შესაძლებლობების მიცემას ემსახურებოდა. 
უნდა აღინიშნოს, რომ იმავე პერიოდში პრეზიდენტის ადმინისტრაციაში დასაქმდნენ ბევრად უფრო  წარმატებული ქართველი სტუდენტები წამყვანი ამერიკული და ევროპული უნივერსიტეტებიდან (კოლუმბია, სიანს პო და ვესტ პოინტი). 
ალექსანდრ კრევო  2019 წლის 1 აპრილიდან 2022 წლის 31 დეკემბრამდე მუშაობდა კომუნიკაციის სამსახურის სპეციალისტის პოზიციაზე შრომითი ხელშეკრულებით. მისი საჯარო მოხელის პოზიციაზე დასაქმება არ მოხდა, რადგან ვერ წარმოადგინა უმაღლესი განათლების  დამადასუტერებელი დოკუმენტი. 2023 წლიდან  პრეზიდენტის ადმინისტრაციამ არ გააგრძელა მასთან შრომითი ხელშეკრულება, ამის ერთ-ერთი  მიზეზი იყო მისი მხრიდან კოვიდრეგულაციების უხეში დარღვევა, რითაც საფრთხე შეუქმნა თანამშრომლების ჯანმრთელობას. 
აღნიშნულიდან გამომდინარე, ნათელია, რომ  მას არ აქვს არც უფლება და არც ლეგიტიმაცია, გაავრცელოს ჭორები პრეზიდენტის  თითქოსდა პოზიციებსა და მოსაზრებებზე.  
ყველაზე გასაკვირი და ნამდილად სამწუხაროა, თუ რა სისწრაფით აღიქვა, აითვისა და გაითავისა უცხოეთში გაზრდილმა ახალგაზრდამ საქართველოს პოლიტიკური სივრცის  ყველაზე მახინჯი და უღირსი თვისებები- წერს პრეზიდენტის ადმინისტრაცია.

პრეზიდენტის ადმინისტრაციიდან "ნაციონალურ მოძრაობაში" გადასულმა ალექსანდრე კრევო-ასათიანმა "პირველებთან" ისაუბრა პრეზიდენტსა და ოლიგარქ ივანიშვილს შორის კავშირზე, ასევე, არ გამორიცხა, რომ სალომე ზურაბიშვილი მიხეილ სააკაშვილს შეიწყალებს.