აქციაზე დაკავებული ქალის, ნათია ძიძიგურის მიერ პოლიციელების მიმართ გამოთქმულ სექსუალური შევიწროების ბრალდებას შინაგან საქმეთა მინისტრობის კანდიდატი ვახტანგ გომელაური „სამარცხვინოს” უწოდებს.

მისი თქმით, ასეთ ფაქტს ის ერთი პროცენტითაც კი არ უშვებს და ამბობს. გომელაური მტკიცებულებებს ითხოვს: 

ასეთი რამ მართლა არ გამიგია. არ ვიცი როგორ ვთქვა, ასეთი საქციელი, ბრალდება არასდროს ყოფილა ელემენტარულად. მუხლებზე დამაყენესო, მკვლელებს და რეციდივისტებს არ ვექცევით ასე რომ ვაკავებთ ხოლმე. ახალგაზრდა გოგოა, როგორ წარმოგიდგენიათ ახლა ასეთი სისულელეები, ქართველმა პოლიციელებმა აიყვანეს, მუხლებზე დააყენეს და მიჰყავდათ. დაამტკიცონ. ასე მეც შემიძლია დაგაბრალოთ თქვენ, რომ მოხვედით ჩემს სახლში, აწამეთ ჩემი შვილი, ხომ უნდა დავამტკიცო ელემენტარულად? მან უნდა დაგვიმტკიცოს ჯერ ბრალდება.

1%-საც არ ვუშვებ, რომ ასეთი რამ მოხდა. მართლა ამაზრზენია. ისეთი ბრალდებაა, რომ ელემენტარულად, მე თვითონ მრცხვენია. ასეთი ბრალდება საიდან მოიგონეს, ძალიან ცუდი თემაა. როგორც შს მინისტრი და როგორც თუნდაც მოქალაქე ვამბობ, ერთ პროცენტსაც არ ვუშვებ. უმძიმესი, რაც იყო, თუნდაც 2012 წლამდე, მაშინაც არ დავუშვებ ასეთ რამეს“, -  განაცხადა გომელაურმა.

19 ნოემბერს, თსუს-თან საპროტესტო აქციის დარბევისას დაკავებულმა ქალმა ნათია ძიძიგურმა პოლიციელები სექსუალურ შევიწროებაში დაადანაშაულა.

მისი თქმით, სამართალდამცველებმა იზოლატორამდე მთელი გზა მუხლებზე დაყენებული ატარეს.