საქართველოს მეხუთე პრეზიდენტი საახალწლო მიმართვას ავრცელებს - სალომე ზურაბიშვილი ამბობს, საქართველო ძალიან ძლიერია და ის ქართველ ხალხთან დგას.
ამასთან, ზურაბიშვილმა ყურადღება იმ მნიშვნელოვან თარიღებზე გაამახვილა, როცა მთელი ქვეყანა ერთიანინი იყო.
ამის პარალელურად, მეხუთე პრეზიდენტის თქმით, 2024 წელს ქართულმა ოცნებამ რუსული კანონები მიიღო და მოქალაქეების წინააღმდეგ რეპრესიები დაიწყო.
კარგიც უნდა გავიხსენოთ, ეს იყო წელი დიდი ერთიანობის, როცა მივიღეთ კანდიდატის სტატუსი წინა წლის ბოლოს და იანვარში კიდევ ვიყავით აღტაცებულნი და გახარებულნი ამ არაჩვეულებრივი ნაბიჯით. ჩვენ ვიყავით ერთნი და გახარებულნი, როცა საქართველო გავიდა ევროპულ ასპარეზზე ფეხბურთით. ჩვენ ვიყავით ერთიანნი და გახარებულნი, როცა ვიმარჯვებდით ოლიმპიურ თამაშებზე და როცა ქართულ დროშას ვუყურებდით და ქართულ ჰიმნს ვუსმენდით. ჩვენ ვიყავით ერთად და ჩვენ ვიქნებით ყოველთვის ერთად იმიტომ, რომ საქართველო არის ძალიან ძლიერი.
ამ წელმა სხვა რაღაცებიც მოგვიტანა, ეს წელი იყო რუსული კანონისა და რუსული კანონების წელი, ეს წელი იყო რუსული მეთოდების, რუსული რეპრესიების ჩვენი ხალხის წინააღმდეგ, ჩვენი სულის წინააღმდეგ, ჩვენი მომავლის წინააღმდეგ და ამდენად, არ ვიცი როგორ დარჩება 2024 წელი ჩვენს მეხსიერებაში, შეიძლება ერთი გავიხსენოთ, შეიძლება მეორე გავიხსენოთ, მაგრამ ამ ყველაფრის მიუხედავად, ჩვენ გავიარეთ ეს წელი, ჩვენ მოვედით ბოლომდე", - თქვა პრეზიდენტმა მილოცვაში.
აღსანიშნავია, რომ პოლიტიკური კრიზისის ფონზე პრეზიდენტმა მიმართვა საჯარო სამსახურებიდან პოლიტიკური ნიშნით გათავისუფლებულ ადამიანებთან ერთად გააკეთა. სალომე ზურაბიშვილის თქმით, სახელმწიფო არ არსებობს, თუ არ არსებობს ძლიერი საჯარო მოხელე.
მეხუთე პრეზიდენტის შეფასებით, "ამ ადამიანებმა თავისუფლება დააყენეს ყველაზე მაღლა".
დღეს მე გილოცავთ ახალ წელს, ამ ადამიანებთან ერთად, რომლებიც არიან მხოლოდ ერთი პატარა ნაწილი იმ ადამიანების, იმ საჯარო მოხელეების, რომლებიც დაითხოვეს დღეს, 86 ადამიანი და გუშინ და გუშინწინ და ეს ალბათ გაგრძელდება, მაგრამ ესეც გამარჯვება არის, ეს ადამიანები არიან ისინი, რომლებმაც თავისუფლება დააყენეს ყველაზე მაღლა, რომლებმაც ღირსება დააყენეს ყველაზე მაღლა, რომლებმაც იციან, რომ ქვეყანაზე და მის სიყვარულზე მაღლა არაფერი არასოდეს არ უნდა იდგეს და ეს ნიშნავს, რომ ეს ადამიანები, ვინც დღეს ჩემთან არიან, არიან გამარჯვებულნი, არიან ძლიერნი და მომავალი მათი არის იმიტომ, რომ სახელმწიფო არ არსებობს, თუ არ არსებობს ძლიერი, ღირსეული საჯარო მოხელე - ეს არის საყრდენი, ეს არის მეხსიერება, ეს არის ყველაფერი, რაც ქმნის სახელმწიფოს და ჩვენთვის ყველასთვის, ყველაზე ღირსეული და ყველაზე ძვირფასი არის სწორედ სახელმწიფო," - განაცხადა პრეზიდენტმა.
სალომე ზურაბიშვილმა საახალწლო მიმართვაში თქვა, რომ საქართველოს მოქალაქეები სახელმწიფოს გარე და შიდა რუსებისგან იცავენ.
მეხუთე პრეზიდენტი ამბობს, უცნობია, რატომ დგანან ადამიანები "იმ მხარეს, რომელიც არ არის საქართველოს მხარე", მაგრამ აღნიშნა, რომ ეს დაყოფაც ვერ გაძლებს და ქართველი ერი ერთიანობას დაუბრუნდება.
საქართველო მხოლოდ ბუნება არ არის, მხოლოდ ადამიანებიც არ არის, არის სწორედ ის, რაც მოგვდის საუკუნეების შემდეგ, რაც შეიქმნა ძველად ბრძოლით, გაუთავებელი ბრძოლით და რაც ჩამოყალიბდა, როგორც სახელმწიფო, ამას ვიცავთ ჩვენ დღეს, ვიცავთ რუსებისგან გარეთ, ვიცავთ შიდა რუსებისგან, ბევრნი არიან თუ ცოტანი არიან.
არ ვიცით, ვინ რისთვის დგას იმ მხარეს, რომელიც არ არის საქართველოს მხარე, მაგრამ ეს დაყოფა, დაყოფაც არ გაძლებს იმიტომ, რომ დადგება ის დრო, როცა ისევ დავუბრუნდებით სწორედ ერთობას, ერთიანობას, რადგანაც ეს არის, რაც ჩვენ ვიცით, რომ ამითი გადავრჩებით, ჩვენ ამითი გადავრჩით საუკუნეების განმავლობაში, როცა ერთად ვიყავით და დღეს ის, რაც ხდება, [...] არის ნამდვილი სასწაული, დღეს, როცა გაიშალა ეს უზარმაზარი სუფრა რუსთაველზე, რომელიც სწორედ არის ერთიანობის სუფრა, სიყვარულის სუფრა, მომავლის სუფრა. ამითი ჩვენ ყველგან გავალთ, ამითი ჩვენ ყველას გავაკვირვებთ, ამითი ჩვენ ჩვენს თავს გავაკვირვებთ, როცა ერთად, ახლა მალე ვიმღერებთ მრავალჟამიერს იმიტომ, რომ ეს არის ჩვენი სული, ჩვენი ძალა, რასაც ვერავინ ვერასოდეს ვერ წაგვართმევს.
ამიტომ, მინდა, რომ ყველას მოგილოცოთ 2025 წელი, როგორც ნამდვილი გამარჯვების წელი, გამარჯვების წელი ჩვენს თავზე, რომ ყველაფერი დავძლიოთ, რაც ჩვენში შეიძლება არ იყოს საკმარისი, შეიძლება იყოს ცუდი, დავძლიოთ ყველაფერი, დავძლიოთ ერთად და ვიყავით ყველანი გამარჯვებულნი.
გილოცავთ ახალ წელს, - დასძინა საქართველოს პრეზიდენტმა.
