"ამ ბავშვების სიცოცხლე დღეებით და საათებით იზომება" - ექიმების მიმართვა "ქართულ ოცნებას"
სამედიცინო სფეროს წარმომადგენლების განცხადებით, დიუშენის კუნთოვანი დისტროფიით დაავადებული ბავშვების სიცოცხლე დღეებითა და საათებით იზომება.
ისინი მშობლებთან ერთად სახემწიფოსგან თანამედროვე მკურნალობის ხელმისაწვდომობას ითხოვენ.
სახელმწიფოსგან, მშობლებთან ერთად ვითხოვთ, რომ თანამედროვე მკურნალობის ხელმისაწვდომობა გახდეს ამ პაციენტებისთვის მისაღები. ევროპაში უკვე ძალიან ბევრი კვლევა მიმდინარეობს ამ მედიკამენტებთან მიმართებაში და არის საკმაოდ დადებითი შედეგები. სახელმწიფო ვალდებული არის, ეს იქნება იშვიათი დაავადების მქონე ადამიანი, თუ სხვა ნებისმიერი ჯანმრთელობის მდგომარეობის გაუარესება, მისთვის იყოს პრიორიტეტი," - ამბობს ენდოკრინოლოგი ლაშა უჩავა.
ქირურგი, "ნიუ ჰოსპიტალის" ბავშვთა ჯანმრთელობის ცენტრის ქირურგიული მიმართულების ხელმძღვანელი, ლევან ფერაძე განმარტავს, რომ სახელმწიფოს შეეძლო წამალი პირდაპირ ეყიდა, ან სპეციალისტები ჩამოეყვანა და წამალთან დაკავშირებით ემსჯელათ, ან ფარმაცევტულ ფირმასთან ხელშეკრულება დაედო, თუმცა მისივე თქმით, ხელისუფლებას მხოლოდ საკუთარი კეთილდღეობა ადარდებს.
ამ ადამიანების, ამ ბავშვების სიცოცხლე დღეებით და საათებით იზომება. ბევრი რამე შეეძლო ხელისუფლებას, შეეძლოთ უბრალოდ ეყიდათ ეს წამალი, შეეძლოთ ჩამოეყვანათ სპეციალისტები, ემსჯელათ მათთან ერთად, როგორ უნდა მიიღონ ეს წამალი და შეეძლოთ საერთოდ ფირმასთან დაედოთ ხელშეკრულება. ბავშვები რომ იყვნენ 2-3 ათასი და მათი მშობლები შესაბამისად, შეიძლება დაეხარჯა ეს თანხა ხელისუფლებას, მაგრამ ხელისუფლებას ადარდებს მხოლოდ ერთი რამე, საკუთარი კეთილდღეობა, არჩევნებზე მოპოვებული ხმები," - ამბობს ლევან ფერაძე.
ცნობისთვის დიუშენის კუნთოვანი დისტროფიით დაავადებული ბავშვების მშობლები, უკვე კვირებია მტავრობის კანცელარიასთან უწყვეტ პროტესტს მართავენ. ისინი შვილებისთვის წამალს ითხოვენ, რომელიც მათი თქმით, ბავშვების სიცოცხლეს გაახანგრძლივებს და გააუმჯობესებს.
ფოტო: ლევან ზაზაძე
