დიუშენით დაავადებული ბავშვების მშობლები სამთავრობო მედიების მიერ გავრცელებულ ინფორმაციას პასუხობენ და მას "პროპაგანდას" უწოდებენ. საუბარია სამთავრობო ექსპერტებზე, რომლებიც ამტკიცებენ, რომ დიუშენის სინდრომის მქონე ბავშვებისთვის საჭირო ინვენტარებს სახელმწიფო "ისედაც აფინანსებდა".

მშობლების თქმით, "ოცნების" ხელისუფლებამ საკითხზე რეაგირება მხოლოდ მას შემდეგ დაიწყო, რაც საზოგადოებრივი მხარდაჭერა მასშტაბური გახდა. მათი განცხადებით, სწორედ ორწლიანი უშედეგო ბრძოლისა და „დახურული კარის“ პოლიტიკის შემდეგ გახდნენ იძულებულები, პრობლემა საჯაროდ გამოეტანათ.

მათი შეფასებით, ახლა მიმდინარეობს კამპანია, რომლის მიზანიც საზოგადოების დარწმუნებაა, თითქოს დიუშენის სინდრომის მქონე ბავშვებს დამატებითი დახმარება და ძვირადღირებული მკურნალობა რეალურად არ სჭირდებათ.

როგორც კი დაინახა ხელისუფლებამ, რომ ბავშვებისკენ წამოვიდა მხარდაჭერა, ეს თანხები ჩვენდა გასაოცრადაც ავიდა მილიონამდე, ამას ვერც კი წარმოვიდგენდით, და ჩვენ თავიდანვე გავაჟღერეთ და სტუდენტებმაც გააჟღერეს, რომ ეს ყველაფერი კეთდებოდა იმიტომ, რომ ბავშვებისთვის შეგვეძინა ის აღჭურვილობა, რაც მათ სჭირდებათ, ეტლები იქნება ეს, ამწეები თუ ა.შ. და მოკლედ, ახლა აგორდა პროპაგანდა, რომ თითქოს 3 მლნ-ი იარჯება ყოვეწლიურად ჩვენი შვილების დასახმარებლად. მაშინ კითხვა მაქვს, რატომ ვდგავართ მშობლები ქუჩაში, ხალხო? ჩვენ რატომ გამოვედით ორწლიანი ბრძოლის შემდეგ დახურულ კარს მიღმა, ჩვენ იძლებულები გავხდით, გამოვსულიყავით ქუჩაში. ახლავე გეტყვით, რასაც ყიდულობს ეს მთავრობა ამ ბავშვებისთვის, ჯერ ისევ ჩვენი კომუნიკაციის შემდეგ დაიწყო მთავრობა დიუშენზე ზრუნვა, - ამბობს მშობელი.

მე მინდა, გია აბაშიძეს მივმართო, რომელიც არის ჩემი ძელი კოლეგა და ნაცნობი: გია, მოდი, შენ გყავდეს დიუშენიანი ბავშვები და მე მოგცემ მილიონნახევარ ლარს. მოდი, გავცვალოთ ადგილები, შენ გყავდეს ჩვენნაირი ბავშვები და მერე ვნახოთ, რამდენი ფული დაგჭირდება. ასე რომ, ეს საზიზღრობა, ეს კამპანია, რაც ამათ დაიწყეს, რომ თურმე ბავშვებს ფული არ სჭირდებათ, ეს კამპანია ემსახურება იმას, რომ ხელისუფლებამაც არაფერი გააკეთოს წამლების შემოსატანად. თუ აქამდე ესენი იყვნენ თავდაცვის რეჟიმში, რომ "წამალი რაში გჭირდებათ, ეს წამალი არ ვარგა, სახელმწიფომ წამალზე ფული არ უნდა დახარჯოს", ახლა დაიწყეს კამპანია, რომ თურმე ჩვენ ფული არაფერში გვწირდება, - ამბობს კახა წიქარიშვილი.

შეგახსენებთ, რომ „დაიცავი ილიაუნის“ საქველმოქმედო ლაივ-მარათონში, დიუშენის კუნთოვანი დისტროფიის მქონე ბავშვების მხარდასაჭერად, უკვე 1 500 000 ლარზე მეტი შეგროვდა. ინიციატივას ათეულობით კომპანია, გამომცემლობა, უნივერსიტეტი და კლინიკა შეუერთდა.