სასახლის ღობის საქმის ერთ-ერთ ეპიზოდზე ბრალდებული 8 პირის საქმეზე განაჩენი დღეს გამოცხადდება. სხდომა თბილისის საქალაქო სასამართლოში მიმდინარეობს. 

მოსამართლე განაჩანს გამოუტანს: ზურაბ ჭავჭანიძეს, ამირან დოლიშვილს, ვლადიმერ გველესიანს, ალექსანდრე ჩილაჩავას, ანტონ ვარდანიძეს, გენადი კუპრეიშვილს, სულხან ტუღუშსა და რამაზ მამულაძეს.

სხდომას ესწრება გაძევებული ზურაბ ჭავჭანიძე - ბათუმელი მედროშე საბოლოო სიტყვით ისარგებლებს. დღესვე გახდება ცნობილი, აღიარებს თუ არა ის ბრალს და მოითხოვს თუ არა საპროცესო შეთანხმებას.

აღნიშნულ ეპიზოდზე სულ 14 ბრალდებული იყო, მათგან 6 პირს - გიორგი რურუას, გიორგი ქორქიას,ლევან ჯიქიას, ხვიჩა გოგოხიას, ლაშა ივანაძეს და სერგო მეგრელიშვილს საპროცესო შეთანხმება გაუფორმდა და ისინი სხდომათა დარბაზიდან გათავისუფლდნენ.

4 ოქტომბერს განვითარებულ მოვლენებთან დაკავშირებით საერთო ჯამში სისხლისსამართლებრივ პასუხისგებაში 64 პირი მიეცა. ამ ეტაპზე,  22 პირთან საპროცესო შეთანხმება გაფორმდა. 

• 4 ოქტომბერს განვითარებულ მოვლენებთან დაკავშირებით,  ზურაბ ჭავჭანიძეს, ვლადიმერ გველესიანს, ამირან დოლიშვილს, ანტონ ვარდანიძეს, ალექსანდრე ჩილაჩავას, გენადი კუპრეიშვილს, სულხან ტუღუშსა და რამაზ მამულაძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით (სტრატეგიული და განსაკუთრებული მნიშვნელობის ობიექტის ხელში ჩაგდების მცდელობა, ჩადენილი ჯგუფურად) და 225-ე მუხლის მეორე ნაწილით (ჯგუფურ ძალადობაში მონაწილეობა) წარედგინათ, რაც სასჯელის სახედ და ზომად ექვს წლამდე თავისუფლების აღკვეთას ითვალისწინებს.