აშშ-ს საკვებისა და წამლის ადმინისტრაციამ (FDA)  Covid-19-ის სამკურნალოდ Pfizer-ის ანტივირუსულ აბ პაქსლოვიდის გადაუდებელი გამოყენების ავტორიზაცია გასცა.

 ტაბლეტის მიღებას ექიმის დანიშნულების შესაბამისად შეძლებენ ინფიცირებული, 12 წლის ზემოთ რისკჯგუფში შემავალი პირები, რომლებიც სულ მცირე 39,9 კილოგრამს იწონიან. FDA-ს განცხადების თანახმად, ტაბლეტების მიღება რეკომენდებულია კოვიდის  დადასტურებიდან  მალევე და სიმპტომების გამოვლენიდან ხუთი დღის განმავლობაში.

კვლევის თანახმად, აღნიშნული აბებით მკურნალობა 89 %-ით ამცირებს ჰოსპიტალიზაციის ან გარდაცვალების რისკებს.

FDA-მ დააზუსტა, რომ Paxlovid არაა განკუთვნილი კოვიდის პრევენციისთვის და არ ანაცვლებს ვაქცინაციას.

Paxlovid-ის დღევანდელი ავტორიზაცია არის კიდევ ერთი შესანიშნავია მაგალითი იმისა, თუ როგორ დაგვეხმარება მეცნიერება საბოლოო ჯამში დავამარცხოთ პანდემია, რომელიც ორი წლის თავზეც აგრძელებს მსოფლიოს გარშემო სიცოცხლეების განადგურებას", - განაცხადა Pfizer-ის აღმასრულებელმა დირექტორმა, ალბერტ ბურლამ.