"ოცნების" შეთავაზებას საპატრიარქოს არა ექნება - ამის შესახებ ინფორმაცია "პირველებს" მამა გიორგი ზვიადაძემ მიაწოდა. პროტოპრესვიტერი მედიას ეუბნება, რომ ხელისუფლების არაფორმალურ შეთავაზებაზე, მართმადიდებლობა სახელმწიფო რელიგიად გამოეცხადებინათ, იმსჯელეს და უარის თქმის მიზეზიც იპოვეს.

მამა გიორგი ზვიადაძის თქმით, საპატრიარქო მთავარ საფრთხედ სახელმწიფო დაქვემდებარებაში გადასვლას განიხილავს. 

"ეკლესიის ერთმნიშვნელოვანი დამოკიდებულებაა, რომ არსებული სამართლებრივი მოდელი ეკლესიისა და სახელმწიფოს ურთიერთობისა უნდა შენარჩუნდეს ისე, როგორც არის" - ამბობს პროტოპრესვიტერი.

"არაოფიციალურ დონეზე იყო გარკვეული კითხვა საქართველოს წმინდა მართლმადიდებელ ეკლესიასთან, რომ ხომ არ იქნებოდა უკეთესი ეკლესიის ავტორიტეტის კიდევ უფრო ამაღლებისთვის და მისი სტატუსის კიდევ უფრო გაძლიერებისთვის, რომ სახელმწიფო რელიგიად გამოცხადებულიყო მართლმადიდებლობა. საქართველოს მართლმადიდებელი ეკლესია მიიჩნევს, რომ სახელმწიფო რელიგიად მართლმადიდებლობის გამოცხადება, რა თქმა უნდა, გულისხმობს ურთიერთდაქვემდებარების პროცესს. ეს ეკლესიისთვის მიუღებელია. რა თქმა უნდა, არის ბევრი რისკი. შეიძლება, დღეისთვის, დღეს არსებულ ხელისუფლებასთან მიმართებაში ეს არ იყოს, მაგრამ ზოგადად, ეს გულისხმობს გარკვეულ დაქვემდებარებას სახელმწიფოსადმი. საქართველოს ეკლესიას ძალიან კარგად აქვს შესწავლილი ის პრაქტიკა, რაც გულისხმობს მართლმადიდებლობის სახელმწიფო რელიგიად გამოცხადებას, გარკვეულ რისკებს შეიცავს და ამიტომ, ეკლესიის ერთმნიშვნელოვანი დამოკიდებულებაა, რომ არსებული სამართლებრივი მოდელი ეკლესიისა და სახელმწიფოს ურთიერთობისა უნდა შენარჩუნდეს ისე, როგორც არის. ყველაზე დიდი რისკი ის არის, როგრო გამოიყენებს ამას რომელიმე ხელისუფლება. დღეს ჩვენ ხელისუფლებასთან არ გვაქვს პრობლემა და არის უაღრესად ჰარმონიული ურთიერთობა, მაგრამ, მომავალში როგორ იქნება, ეს ძალიან დიდ რისკებს შეიცავს და სახელმწიფო რელიგიად გამოცხადება თუნდა მართლმადიდებლობის იმ რისკებთან არის დაკავშირებული, რომ ის დაექვემდებაროს სახელმწიფოს გავლენას", - ამბობს მამა გიორგი ზვიადაძე. 

საქართველოს მთავრობასა და საქართველოს საპატრიარქოს შორის რომ მოლაპარაკებები გაიმართა, ამას ადასტურებს საპატრიარქოს წარმომადგენელი, მამა გიორგი ჯაღმაიძეს.

გუშინ გავრცელდა ინფორმაცია, რომ “ქართული ოცნება” საპატრიარქოსთან კონსულტაციებს გადის მართლმადიდებლობის სახელმწიფო რელიგიად გამოცხადების შესახებ.