თბილისის სახელმწიფო უნივერსიტეტთან და ილიას სახელმწიფო უნივერსიტეტთან საპროტესტო აქცია დასრულდა - ილიაუნელები ღამეს უნივერსიტეტში გაათენებენ.

ამასთან, ცნობილი ხდება, რომ მოქალაქეები ხვალ, 16 ნოემბერს, 11:00 საათზე, ცენტრალურ საარჩევნო კომისიასთან შეიკრიბებიან და არჩევნების მიტაცებას გააპროტესტებენ. 

ცნობისთვის, ცენტრალური საარჩევნო კომისია არჩევნების შედეგებს ხვალ, 16 ნოემბერს, 11:00 საათზე შეაჯამებს - ამის შესახებ ინფორმაცია "პირველებს" ცესკოს პრესსამსახურში დაუდასტურეს.

შეგახსენებთ, რომ თბილისში პროტესტმა იფეთქა. დედაქალაქის ქუჩებში რამდენიმე საპროტესტო კერა არსებობდა. თავდაპირველად, პირველი რესპუბლიკის მოედნიდან ჯგუფ "დაიტოვეს" მიერ ორგანიზებული მსვლელობა დაიწყო, რომელიც თსუ-ის მიმართულებით დაიძრა.

თბილისის სახელმწიფო უნივერსიტეტთან სიტუაცია უკიდურესად დაიძაბა. ადგილზე მობილიზებული სამართალდამცველები სტუდენტებსა და ლექტორებს შენობაში შესვლის საშუალებას არ აძლევდნენ.

პარალელურად, პროტესტის ერთ-ერთი კერა ილიას სახელმწიფო უნივერსიტეტი იყო. ახალგაზრდები ბათუმის სახელმწიფო უნივერსიტეტის სტუდენტებს მხარდაჭერას უცხადებდნენ და არჩევნების გაყალბებას აპროტესტებდნენ.