საქართველოს პატრიარქმა ბიზნესმენი ვანო ჩხარტიშვილი “ქართული გალობისა და მრავალხმიანობის განვითარებაში შეტანილი განსაკუთრებული  წვლილისა და დაბადებიდან 60 წლისთავთან დაკავშირებით საპატრიარქოს სპეციალური სიგელით დააჯილდოვა. ინფორმაციას საპატრიარქო ავრცელებს.

ვანო ჩხარტიშვილის ოჯახი საპატრიარქოსთან ათეული წლებია თანამშრომლობს და მხარს უჭერს მას ქართული იდენტობისა და  კულტურული  საგანძურების გადარჩენა-განვითარების საქმეში. ერთ-ერთი ასეთი ერთობლივი  წარმატებული პროექტი უკავშირდება ქართული მრავალხმიანობის მემკვიდრეობითობის შენარჩუნების საქმეს, რომელსაც 2006 წელს  ჩაეყარა საფუძველი.

ბიზნესმენის ინიციატივითა და პატრიარქის კურთხევით დაფუძნდა ქართული საგალობლისა და სიმღერის საერთაშორისო ცენტრი,  რამელმაც მოიზიდა დარგის საუკეთესო სპეციალისტები, გახსნა რამდენიმე რეგიონული სკოლა და   უმაღლესი სასწავლებელი თბილისში. 2006 წლის 19 სექტემბრიდან საქმიანობა დაიწყო და აბიტურიენტების  პირველი  ნაკადი მიიღო საეკლესიო გალობისა და ხალხური სიმღერის თბილისის უმაღლესმა სასწავლებელმა.

განვითარების კვალობაზე სასწავლებელი  ამჟამად ფუნქციონირებს, როგორც გიორგი მთაწმინდელის სახელობის საეკლესიო გალობის უნივერსიტეტი.

უნივერსიტეტი ამზადებს მაღალი კვალიფიკაციის რეგენტებსა და ლოტბარებს, რომლებიც  ქართული მრავალხმიანობის შენარჩუნება- განვითარების საქმეს ემსახურებიან როგორც ქვეყნის შიგნით, ისე უცხოეთში, ქართულ ემიგრაციაში.

დღეისათვის საქართველოში მოქმედი ფოლკლორული თუ გალობის გუნდების უდიდეს ნაწილს ამ სასწავლებლის კურსდამთავრებულები წარმოადგენენ.

გარდა აღნიშნულისა, ბიზნესმენის ინიციატივით 2012 წელს დაფუძნდა ფონდი ქართული გალობა, რომელიც ქართული მრავალხმიანობის მხარდასაჭერად სისტემატურად ატარებს ფოლკლორულ ფესტივალებს, გამოჩენიული ლოტბარების დაჯილდოების საღამოებს, მხარს უჭერს  გამოცემებს, კონცერტებს, გუნდებს, ახალი სახეების წარმოჩენას, კურსდამთავრებულების  დასაქმებას რეგიონებსა და უცხოეთში ქართული მრავალხმიანობის განვითარებას. ფონდს ხელმძღვანელობს ბიზნესმენის მეუღლე ნანა გოთუა.

ვანო ჩხარტიშვილის დაფუძნებულია აგრეთვე ფონდი “აი ია“, რომელიც სმენადაქვეითებული ბავშვების რეაბილიტაცია / აბილიტაციითაა  დაკავებული” - აცხადებს საპატრიარქო.

ვანო ჩხარტიშვილი, რომელსაც მინი ოლიგარქად მოიხსენიებენ, ბიძინა ივანიშვილთან დაახლოებული ბიზნესმენია. მასთან დაკავშირებით სუს-ის ყოფილმა მაღალჩინოსანმა სოსო გოგაშვილმა სკანდალური განცხადება გააკეთა. სუსის უფროსის ყოფილი მოადგილის, სოსო გოგაშვილის თქმით, გავლენიანი ბიზნესმენი ვანო  ჩხარტიშვილი არკვევდა, რა რეაქცია ექნებოდათ მეუფეებს პატრიარქის პენსიაში გაშვებაზე. 

გარდა ამისა, გოგაშვილმა პატრიარქის ჩანაცვლების გეგმაზე ისაუბრა, რომელიც ФСБ-ს აგენტებს ჰქონდათ და აღნიშნა, რომ  სწორედ ჩხარტიშვილმა მასთან საუბარში თქვა, რომ "მეუფე შიოს კანდიდატურა შეთანხმებული იყო უფროსთან".