გერმანიის ადმინისტრაციული სასამართლოს მიერ გაკეთებული განცხადება ადამიანის უფლებების დაცვის კუთხით მომუშავე მოქალაქეებისთვის გასაკვირი არ არის.

• საუბარია გერმანიის სასამართლოს განცხადებაზე, სადა წერია, რომ "საქართველოს თავისუფალ ქვეყნად მიჩნევა შეუთავსებელია EU-ს კანონმდებლობასთან და ამასთან დაკავშირებით სერიოზული ეჭვები არსებობს".

იურისტები ამბობენ, რომ ადამიანის უფლებებისა და კანონის უზენაესობის თვალსაზრისით, 2024 წელი განსაკუთრებით მძიმე იყო. გოგა ხატიაშვილის შეფასებით, "ქართულმა ოცნებამ" კანონმდებლობაში საერთაშორისო სტანდარტების საწინააღმდეგო ცვლილებები შეიტანა და მართლმსაჯულების სისტემა განსხვავებული აზრის მატარებელი მოქალაქეების წინააღმდეგ რეპრესიებისთვის გამოიყენა. 

როდესაც ფასდება ის, თუ რამდენად აკმაყოფილებს ქვეყანა უსაფრთხოების კრიტერიუმებს, რა თქმა უნდა, ასეთ დროს უნდა იყოს გათვალისწინებული ქვეყანაში არსებული ვითარება და ფონი. გასული წელი განსაკუთრებით მძიმე იყო ადამიანის უფლებებისა და კანონის უზენაესობის თვალსაზრისით. "ქართულმა ოცნებამ" მიიღო ადამიანის უფლებათა საერთაშორისო სტანდარტების საწინააღმდეგო კანონმდებლობა, რომელსაც რეპრესიულად იყენებს ადამიანების მიმართ.

ასევე ვნახეთ არაერთი ადამიანი, რომელიც გაათავისუფლეს საჯარო სამსახურიდან მათ მიერ გამოხატული მოსაზრებების გამო. ადამიანების მიმართ მიმდინარეობს დევნა. ასევე საკმაოდ მძიმე მდგომარეობა არის ფიზიკური უსაფრთხოების კუთხით. ჩვენ ვნახეთ პოლიციის მხრიდან გამოყენებული წამებისა თუ დამამცირებელი მოპყრობის არაერთი შემთხვევა. ასევე აქტიური ფიზიკური ძალადობის შემთხვევები განსაკუთრებით მშვიდობიანი მომიტინგეების მიმართ. გაუარესებულია მდგომარეობა ჟურნალისტების ფიზიკური უსაფრთხოების კუთხით". - განაცხადა გოგა ხატიაშვილმა.

იურისტი გიორგი ბურჯანაძე პოლიტიკური სარჩულით საჯარო მოხელეების გათავისუფლების ფაქტებსაც იხსენებს და ხაზს უსვამს, რომ იმ პირობებში, როდესაც საქართველოში დამოუკიდებელი სასამართლო არ არსებობს, ადამიანის უფლებები ნიველირებულია. 

მას შემდეგ, რაც ვნახეთ წამება ქუჩაში, რაც ვნახეთ პოლიციელები, რომლებიც ტელეფონებს იპარავდნენ და ადამიანებს ძარცვავდნენ, მას შემდეგ, რაც ვნახეთ ის, რომ ყოველდღე ასობით საჯარო მოხელეს უკანონოდ ათავისუფლებენ საჯარო სამსახურიდან იმის გამო, რომ მათ პოზიცია გამოხატეს, საბოლოო ჯამში მივდივართ იქამდე, რომ ადამიანების უფლებები არის ნიველირებული იმ პირობებში, როდესაც საქართველოში დამოუკიდებელი სასამართლო არ არსებობს". - განაცხადა გიორგი ბურჯანაძემ.