მედიაომბუდსმენი საქართველოს პარლამენტს ჟურნალისტების უფლებების დარღვევის შეწყვეტისკენ მოუწოდებს.

არასამთავრობო ორგანიზაცია ავრცელებს განცხადებას და წერს, რომ ომბუდსმენი მზად არის, სამართლებრივი დახმარება გაუწიოს მედიის წარმომადგენლებს.

"დღეს, 8 აპრილს, თბილისში, პარლამენტთან ჟურნალისტების საპროტესტო აქცია მიმდინარეობს. დღეს პარლამენტში არ შეუშვეს საშვის მქონე ჟურნალისტები. პარლამენტის ბიურო დღეს რუსულ კანონს განიხილავს

მედიაომბუდსმენი USAID მედია პროგრამის  დახმარებით აგრძელებს მედიის დახმარებას - პარლამენტთან მყოფ ჟურნალისტებს ვთავაზობთ სამართლებრივ მხარდაჭერას" - წერია ორგანიზაციის განცხადებაში. 

პარლამენტში ბიუროს სხდომაზე რუსული კანონი მეორედ დაინიცირდა. კანონპროექტზე მსჯელობა კი პარლამენტში პარასკევიდან დაიწყება. 

ბიუროს სხდომა ხმაურისა და დაპირისპირების ფონზე მიმდინარეობდა. ოპოზიციონერ დეპუტატებს ჰქონდათ კითხვები სამთავრობო გუნდთან - აინტერესებდათ, რას პასუხობენ ისინი პარტნიორების კრიტიკას, რომლებიც ამბობენ, რომ ქვეყნის ევროპულ მომავალს კითხვის ნიშნის ქვეშ აყენებს რუსული კანონი. ოპოზიცია ითხოვს, რომ რუსული კანონი პარლამენტმა არ მიიღოს.