კოალიცია „ძლიერი საქართველოს“ ლიდერებმა, მანდატებზე უარის თქმასთან დაკავშირებით, განცხადებები დაწერეს.

მათი თქმით, ისინი ჩახსნიან სიებსაც, თუმცა, ეს მოხდება კანონით გათვალისწინებული პროცედურების შემდეგ.

“საკუთარი ხელით ვწერ მანდატის დატოვების შესახებ განცხადებას“, -ამბობს ირაკლი კუპრაძე ვიდეოში, რომელიც კოალიციის გვერდზე ცოტა ხნის წინ გამოქვეყნდა.

პარლამენტში არშესვლაზე ჩვენი პოზიცია დიდი ხანია ნათქვამი გვაქვს, არც არაფერი შეცვლილა. 80-ჯერ განცხადების დაწერას არ ვაპირებთ, ერთხელ დაწერილს და იურიდიულად გამართულს შევიტანთ, რაც უპირობოდ დაკმაყოფილდება. 

პ.ს. სხვათაშორის განცხადებები დიდი ხნის წინ დავწერეთ“,- განაცხადა კუპრაძემ.

“რამდენჯერაც ამირჩევენ, იმდენჯერ ვიტყვი უარს, ასეთი გადაწყვეტილება მაქვს მიღებული“, - ამბობს ფიქრია ჩიხრაძე.

ამასთან დღეს დილით ცნობილი გახდა, რომ „კოალიცია ცვლილებისთვის“ და „ერთიანობა ნაციონალური მოძრაობა“ ცესკოს მიმართავენ, „არ გატარდეს სია რეგისტრაციაში და უფლებამოსილების საკითხი არ გადასცეს პარლამენტს განსახილველადაც კი“.

• საპარლამენტო სიები "ერთიანობა ნაციონალურმა მოძრაობამ" ჩახსნა
• "არალეგიტიმურ პარლამენტში შესვლას არ ვაპირებთ" - "კოალიცია ცვლილებისთვის" საპარლამენტო სიას ხსნის

ოპოზიციის განცხადებიდან რამდენიმე საათში, ცესკოს იურიდიული სამსახურის უფროსმა თქვა, რომ კანონმდებლობა უფლებამოსილების ცნობამდე პარტიულ სიებში არსებულ კანდიდატთა რეგისტრაციის გაუქმებას არ ითვალისწინებს.