პარლამენტთან რუსული კანონის საწინააღმდეგო აქცია 17 აპრილს 11:30 საათიდან განახლდება. ამის შესახებ გირჩი მეტი თავისუფლების ლიდერი ზურა ჯაფარიძე სოციალურ ქსელში წერს.

ჩვენ მოვიგებთ ამ ომს, ეს ქვეყანა აღარასდროს იქნება რუსეთი," - წერს ჯაფარიძე.

ამ წუთებში მომიტინგეთა ნაწილი პარლამენტის გვერდითა შესასვლელებთან არის მობილიზებული. ადგილზე ამ დრომდე რჩება სპეცრაზმი. რამდენჯერმე დაიძაბა სიტუაცია საკანონმდებლო ორგანოსთან, როდესაც გაფრთხილების გარეშე სამართალდამცავებმა მოქალაქეების დაკავება, მათზე ფიზიკური ანგარიშსწორება და დევნა დაიწყეს.

რუსთაველზე მასიური დაკავებები დაიწყო - სპეცრაზმი აქციის მონაწილეებზე ძალადობს და აკავებს:

• "თავშიც მომხვდა, რომ დავვარდი ძირს, ფიზიკურად მისწორდებოდნენ,“ - ამის შესახებ „პირველებთან“ ერთ-ერთი მოქალაქე ყვება.
• იარაღებით გამოგვეკიდნენ - სპეცრაზმმა აქციის მონაწილეებზე ნადირობა ჩიხებში დაიწყო (ვიდეო)

პარლამენტთან დაკავებების რამდენიმე ეპიზოდი იყო. პარლამენტთან მიმდინარე აქციაზე "ლელოს" გენერალური მდივანი, ირაკლი კუპრაძე დააკავეს. მის გარდა სამართალდამცავებმა კიდევ რამდენიმე პირი დააკავეს, მათ შორის გირჩი - მეტი თავისუფლების წევრი. არსებული ინფორმაციით, კუპრაძეს დაკავების დროს ფიზიკურად გაუსწორდნენ.

პარლამენტის უკანა შესასვლელთან სამართალდამცავები მშვიდობიანი აქციის მონაწილეებს აკავებენ. ასევე, შსს-მ გამაფრთხილებელი სიგნალი ჩართო, რის შემდეგაც სპეცრაზმი აქციის დარბევასა და წყლის ჭავლის გამოყენებას იწყებს.

მანამდე სამართალდამცავებმა წიწაკის სპრეი გაუშვეს. რობოკოპებმა პარლამენტის ტერიტორიის მოქალაქეებისგან გაწმენდა დაიწყეს. ადგილზეა წყლის ჭავლის მანქანაც.

"მონებო" - ამ შეძახილების ფონზე მოუწიათ "ოცნების" დეპუტატებს საკანონმდებლო ორგანოს შენობის დატოვება.

კადრებში ჩანს, როგორ ჩამოდიან დეპუტატები პარლამენტში სხდომათა დარბაზიდან კიბეებზე და ამ დროს საპროტესტო აქციის მონაწილეები მათ მიმართავენ - "მონებო".

"ჩვენ ვართ ევროპა", Never Back to USSR - ეს სტიკერები მშვიდობიანი აქციის მონაწილეებმა პარლამენტის შენობის ფანჯრებზე მიაკრეს. 

პარლამენტთან აქცია გრძელდება. შეკრებილები რუსული კანონის ხელმეორედ ინიცირებას აპროტესტებენ.

ფართომასშტაბიანი აქციის ფონზე უწევთ "ქართული ოცნების" დეპუტატებს საკანონმდებლო ორგანოს დატოვება:

• პარლამენტს პაპუაშვილი სპეცრაზმის დახმარებით ტოვებს.
• სესიაზე რუსული კანონის განხილვის პირველი დღის დასრულების შემდეგ დეპუტატები რობოკოპების დახმარებით ტოვებენ.

რუსული კანონის განხილვა სასესიო სხდომაზე დღეს დასრულდა, კენჭისყრა ხვალ გაგრძელდება.

პარლამენტის ჭიშკარი სპეცრაზმს აქვს დაკავებული, ტერიტორია აქციის მონაწილეებისგან გაათავისუფლეს, არც მედიას აქვს მიახლოების საშუალება.

ოპოზიცია კანონპროექტის გაწვევას ითხოვს. სხდომა დღეს დაპირისპირების, ხმაურისა და გინების ფონზე მიმდინარეობდა.

პარლამენტთან დაძაბული ვითარებაა, მობილიზებულია უპრეცენდენტო რაოდენობის სამართალდამცავები. სპეცრაზმი პარლამენტის შენობიდან გარეთ გამოიყვანეს.